Муаллиф- Бобомурод Раҳматуллаев 1979-йилнинг 2–ноябрида Боткен вилоятининг Лайлак туманидаги Оқсув қишлоқ ҳукуматига қарашли Чўянчи қишлоғида туғилган. Ю.Пўлатов
номидаги ўрта мактабда қирғиз тили, ўзбек тили ва адабиётидан дарс беради.
2012-йилда “Мовий ҳислар” номли илк шеърий тўплами нашрдан чиққан.
Осмондаги турналар
Юракларни тирналар
Тарс-турс этиб ёрилар
Боғда ётган кундалар.
Ҳай-ҳай ўлан, жон ўлан
Шаробдан қуй ёр-ёр.
Кетай десак чора йўқ,
Қишлоқда тўй ёр-ёр...
Ним қоронғи зах кулба,
Келинг, дўстлар, ичамиз,
Сизу бизни алдаган
Шум қизлардан кечамиз.
Ҳай-ҳай ўлан, жон ўлан
Дилда алам ёр-ёр...
Биздан тониб кетдилар
Қоши қалам ёр-ёр.
Навқирон ёшлигимиз
Зўр меҳнатда эзилди.
Элу-юртнинг соғинчи
Узоқларда сезилди.
Ҳай-ҳай ўлан, жон ўлан,
Кетолмаймиз ёр-ёр.
Ўзимиздан ўтганни
Айтолмаймиз ёр-ёр.
Сахроларда
чўлларда,
Олисларда
- йўлларда,
Ризқ ахтариб юрибмиз,
Яхши-ёмон қўлларда.
Ҳай-ҳай ўлан, жон ўлан
Кетолмаймиз ёр-ёр.
“Хўжайин”нинг юзидан
Ўтолмаймиз ёр-ёр.
Мовий ҳислар
Ватан надур?!
Ватан надур?!
Ватан маним кўксимдадур.
Отам ўсиб улғайган уй,
Нураб ётган остонадур.
Иймон надур?
Иймон надур?
Иймон маним дилимдадур.
Азонларда ҳақ, деб йиғлаб,
Сажда қилган элимдадур.
Яшаш надур!!
Яшаш надур!!
Яшаш – Машраб девонадур.
Руҳ поклиги ўздин кечмоқ,
Риёзатда илмдадур.
Кетиш нечун!!!
Кетиш нечун!!!
Кетиш ҳаққа етиш учун
Ким учун соғинчу кимга хорлик
Боқийликда пешонадур.