Март ойида давлат раҳбари қўл қўйган қонун лойиҳасига кўра энди ҳар бир фуқаро ўз уйини ёки шахсий мол-мулкини қурол билан ҳимоя қилишга ҳақли.
Мазкур қонуннинг ташаббускорлари ҳисобланган “Ар-намис” фракциясининг етакчиси Феликс Кулов фуқароларни ўз уйини қурол билан бўлсада ҳимоя қилишга даъват қилган.
Жумладан у “Уйга шубҳали шахс кириб келиб, бирор нарсангни ўғирлаб кетишни ният
қилган. Ёки уйингдаги аёлни зўрламоқчи ё болалар бирор хавфга дуч келди дейлик. Бу ҳолда индамай қараб туриш керакми? Биз унга “кел, менинг уйимга кириб, истаганингни қил” дейишимиз керакми? Йигирма киши уйга бостириб кирса нима бўлади? Демак қуролинг бўлса от, қисқаси, уйингни химоя қил. Шундай принцип бўлиши керак”, деб ўз фикрини баён қилган.
Шу вақтга қадар қурол олиб юришга Ички ишлар ва юридик томонларгагина рухсат берилган. Оддий фуқароларга эса ов қуроли ёки коллекция учун қурол тўплаш мумкин эди. Ҳозирги қабул қилинган қонунга кўра оддий фуқаролар ҳам қурол сақлаш ҳуқуқига эга бўлади.Қонун ташаббусчиларининг сўзларига кўра бу тажриба Ғарб давлатларида қўлланилиб келинган. Бу йўл билан жиноятчиликнинг олдини олса бўлади.
Кузатувчи-таҳлилчилар эса бу қонун жиноятчиликнинг олдини олиш билан бирга, бошқа бир жиноятларга йўл очиши мумкинлигидан огоҳлантиришмоқда. Мазкур қонун баҳонасида баъзи инсонлар ўзларининг қора ниятларини амалга ошириши мумкин дейди улар.
Юрист Абдималик Акматовнинг сўзларига кўра ҳозирги қонун лойиҳаси замоннинг талаби. Лекин фуқароларнинг қурол қўлланиш маданиятидан хабарлари йўқ эканлигини ҳам ёдда тутиш керак. Унинг фикрича қурол қўллаш тартиблари билан таништиришни ҳам йўлга қўйиш керак.
Қонунда фуқароларга хусусий мулкини химоя қилишда қурол фойдаланишга рухсат бериш билан бирга айрим чекловлар хам бор. Яъни хомиладор аёлга ёки болаларга қарата уйнинг эгаси томонидан қурол қўлланиши таъқиқланган.